دنیا کبھی اک نہج پہ ڈھالی نہیں جاتی
ہر کھیل مےں ہر گیند اچھالی نہیں جاتی
اتنا تو ہمیں بھی غمِ ہستی نے نوازا
آتی ہوئی ساعت کبھی خالی نہیں جاتی
مدت ہوئی کہ پرسش احوال کسی نے
اب تک مرے چہرے کی بحالی نہیں جاتی
رسوائی تو دستور محبت مےں لکھی ہے
بازار مےں دستار سنبھالی نہیں جاتی
انسان کی قاتل ہے، فضا کے لئے مہلک
بندوق کی گولی کبھی خالی نہیں جاتی
انگور ہو یا دختر انگور ہو، ہم سے
آئی ہوئی نعمت کبھی ٹالی نہیں جاتی
بے شک یہ تحفظ کی ضمانت سہی، لیکن
ہر بات پہ تلوار اٹھا لی نہیں جاتی
اس طرح سے اقوام مےں پانی ہوا تقسیم
دریا سے بھی اب نہر نکالی نہیں جاتی
کی پرورش شعر پہ جو مےں نے ریاضت
اس کشٹ سے اولاد بھی پالی نہیں جاتی
۔۔۔۔۔۔۔۔۔۔۔۔۔۔۔۔۔۔۔۔۔
اس سے خود آرا و خود سر سے گزارا بھی نہیں
اور قطع دوستی کرنے کا یارا بھی نہیں
موت سے پہلے ہی مر جانا گوارا بھی نہیں
غمزدہ تو ہوں مگر جینے سے ہارا بھی نہیں
آدمی اور زندگی کا بھی عجب سنجوگ ہے
پار کرنا ہے سمندر اور کنارا بھی نہیں
باہمی وابستگی کی آس تو باقی رہے
وہ تو کیا آتا مگر ہم نے پکارا بھی نہیں
رابطہ رکھتے ہےں ہم لیکن بس اس بنیاد پر
وہ کہ جو اپنا نہیں ہے وہ ہمارا بھی نہیں
حسرتیں تو اب بھی ہےں لیکن تلاطم کے بغیر
یعنی دریا بہہ رہا ہے اور دھارا بھی نہیں
دیوتا ہے دیوتا وہ شخص جو اس دور مےں
جنگ جیتا بھی نہیں اور جنگ ہارا بھی نہیں
کتنے جلوے آرزو کے آئنہ خانے مےں تھے
جو نظر آتا ہے عالم یہ تو سارا بھی نہیں
لندن آئے ہو تو کس موسم مےں آئے ہو ضمیر
چلئے ”صفدر“ تو نہیں ہے ”ماہ پارہ“ بھی نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بات ضبط بیاں سے مت کہنا
داستاں، درمیاں سے مت کہنا
اپنے گھر کو سجا سنوار کے جی!
اینٹ کا غم مکاں سے مت کہنا
سچ کی اپنی زبان ہوتی ہے
تم کچھ اپنی زباں سے مت کہنا
تم پہ گزری ہے جو زمانے مےں
جاں سے کہنا، جہاں سے مت کہنا
کشتیاں کس بھنور مےں رہتی ہےں
باد سے، بادباں سے مت کہنا
خواہ تجھ پر قیامتیں گزریں
اپنا دکھ اپنی ماں سے مت کہنا
۔۔۔۔۔۔۔۔۔۔۔۔۔۔۔۔
جتنے تیرے نام کے غم تھے وہ جاں مےں رکھ دیئے
اپنے سارے فائدے جیب زیاں مےں رکھ دیئے
زندگی کو آدمی کتنا اٹھا کر لے گیا
اس زمیں کے راستے بھی کہکشاں مےں رکھ دیئے
تیر اس کے جتنے کچھ دور از ہدف گرتے رہے
ہم نے پھر وہ اپنے قاتل کی کماں مےں رکھ دیئے
ہیر کے ماتھے کا جھومر، سوہنی کی چوڑیاں
کچھ نئے زیور بھی اردو کی دکاں مےں رکھ دیئے
روشنی کا قرض ہم بھی کچھ ادا کر ہی گئے
چند مٹی کے دیئے طاق جہاں مےں رکھ دیئے
جو مرے خوابوں خیالوں مےں کبھی چمکے ضمیر
وہ دھنک ٹکڑے بھی اس کی داستاں مےں رکھ دیئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دنیا ہم کو راس بہت ہے
دریا پی کر پیاس بہت ہے
متوازن نہیں نظم زمانہ
حظ کم اور ہراس بہت ہے
جینا مشکل ہی نہیں اتنا
تھوڑی سی بھی آس بہت ہے
ان کے جسم برہنہ دیکھے
جن کے پاس کپاس بہت ہے
کیسے ہو عرفان حقیقت
تم کو گمان و قیاس بہت ہے
بات اس کی سب سے کیا کرنا
اس سے رشتہ خاص بہت ہے
اس سے کچھ امید نہ رکھنا
جس سے تم کو آس بہت ہے
انساں کتنا لٹتا آیا
پھر بھی اس کے پاس بہت ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہم سے کوئی چیز رد ہوتی نہیں
دلکشی کی کوئی حد ہوتی نہیں
جانے کتنے پیار کا خوگر ہوں مےں
کچھ تمیز نیک و بد ہوتی نہیں
مدھم آوازیں بھی کارآمد تو ہےں
سارے لفظوں پر تو شد ہوتی نہیں
حلقہ ¿ خاصانِ فن و فکر مےں
صرف شہرت مستند ہوتی نہیں
بادہ کش کتنے ملائم لوگ ہےں
بحث مےں بھی رد و کد ہوتی نہیں
مختلف بھی مشترک بھی آدمی
ملک کی حد، دل کی حد ہوتی نہیں
پھول تو ہے پھول اگر پتھر بھی ہوں
اچھی صورت مسترد ہوتی نہیں
کچھ گناہوں سے بہت شرمندہ ہوں
کیا کروں توہین حد ہوتی نہیں
کفر بشریت ہے یہ کیسے کہوں
آرزوئے کارِ بد ہوتی نہیں
زندگی کیونکر سمجھ آئے کہ یہ
صرف اشیاءعدد ہوتی نہیں
یہ تو ”علمی آمریت“ ہے ضمیر
بات مستعمل.... سند ہوتی نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کتنے آقاﺅں کے در پر بندگی ہوگی بہت
کم تعلیٰ کر تجھے شرمندگی ہوگی بہت
رابطے دل کے براہ راست پیدا کیجئے
آڑھتی ہوں گے تو پھر سوداگری ہوگی بہت
یوں سفر طے ہو کہ ہر منزل پہ ہنگامہ رہے
عمر تو کم ہوگی لیکن زندگی ہوگی بہت
خالی ازحکمت نہیں مشرق کا طرز زندگی
سادگی ہوگی تو پھر آسودگی ہوگی بہت
اس طرح راتوں کو سڑکوں پر نہ آوارہ پھرو
شاعری ہوگی بہت تو بے کلی ہوگی بہت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نمازِ بادہ و ساغر قضا ہوتی نہیں ہم سے
بہت غافل ہےں لیکن یہ خطا ہوتی نہیں ہم سے
غریبی کاٹ لیں گے، التجا ہوتی نہیں ہم س
کسی قیمت بھی توہینِ انا ہوتی نہیں ہم سے
وہ بے الفاظ لفظوں کو بھی سُن لیتا ہے سینے مےں
خدا سے مانگ لیتے ہےں، دعا ہوتی نہیں ہم سے
دلوں کا رابطہ بھی اک عجب ریشم کا دھاگہ ہے
وہ آرزردہ تو ہوتی ہے خفا ہوتی نہیں ہم سے
بہت مقروض ہےں ان مہرباں پیڑوں کی چھاﺅں کے
کہ اک پتے کی قیمت بھی ادا ہوتی نہیں ہم سے
اب اس سے بڑھ کر جینے کا سبک اسلوب کیا ہوگا
محبت کر رہے ہےں اور وفا ہوتی نہیں ہم سے
جناب شیخ سے بس اختلاف رائے ہے اتنا
قیامت اور دنیا ایک جا ہوتی نہیں ہم سے
بڑھاپا آخری مہلت ہے استقرار نعمت کا
یہ مالک کی خوشی تو سانحہ ہوتی نہیں ہم سے
یہ کیسی بے نیازانہ عبودیت کا عالم ہے
کہ تیری بندگی بھی اے خدا ہوتی نہیں ہم سے
جوانی ڈھل گئی شائد، بڑھاپا آگیا شائد
کہ اب کوئی خطا بے ساختہ ہوتی نہیں ہم سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زندگی سب سے بڑی سوغات ہے
رات بھی یہ چاندنی کی رات ہے
آج دل مےں یاد تیری.... جس طرح
گاﺅں کے تالاب پر برسات ہے
آخری رخصت مےں جو باتیں ہوئیں
تیری ہی آواز میرے ساتھ ہے
یہ بڑھاپے مےں کھلنڈرا پن مرا
اے مرے بچپن تیری خیرات ہے
آج کل ”میزائلوں“ کی رت سہی
کل کا موسم جگنوﺅں کے ہاتھ ہے
عشق کی ہر چھب سہانی ہے مگر
کم سنی کے پیار کی کیا بات ہے
یہ جہاں تصویر خانہ ہے ضمیر
بہتریں تخلیق عورت ذات ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زمیں پر کس جگہ درویش کا بستر نہیں ہوتا
زمانہ اس کا گھر ہوتا ہے جس کا گھر نہیں ہوتا
تماشا زندگی کا ہم نے دیکھا ہے بہت، لیکن
سرِ مقتل جو ہوتا ہے، سرِ منبر نہیں ہوتا
کوئی شے اپنی وضع خاص سے عاری نہیں ہوتی
جو منظر وادیوں مےں ہے پہاڑوں پر نہیں ہوتا
فقط لوہا کسی تلوار کو عظمت نہیں دیتا
قبائے خسروی سے کوئی اسکندر نہیں ہوتا
خرابی اب تو سناٹے سے کچھ آگے گزر آئی
جو خطرہ شہر مےں ہے دشت کے اندر نہیں ہوتا
ضمانت امن عالم کی نہتے لوگ ہی دیں گے
وہاں جنگیں نہیں ہوتیں، جہاں لشکر نہیں ہوتا
صریر کلک کچھ گمراہ کرتی ہے، مگر شاعر
ذرا سا دوربیں ہوتا ہے، پیغمبر نہیں ہوتا
ذرا سی آبجو سے ہم بھلا کیا مطمئن ہوں گے
سمندر مےں اتر جائیں تو دامن تر نہیں ہوتا
ضمیر جعفری بھی ان بلا نوشیدگاں مےں تھا
کہ خم پی جائیں لیکن ہاتھ مےں ساغر نہیں ہوتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حرف کچھ آنے نہ دو اپنے قلم کردار پر
فرض ہے ہر شاعر و فنکار و ”پتری کار“ پر
کیوں پرندے کر گئے بے موسموں کی ہجرتیں
وقت سے پہلے ہی پت جھڑ آگئی اشجار پر
اس کے ”جے کارے“ بلاﺅ جس نے جنگ جبر مےں
سب سے پہلے اپنا سر پھینکا فرازِ دار پر
کتنا تاوان اس ترقی کا ادا ہم نے کیا
اپنے سب پھولوں کے گجرے رکھ دیئے تلوار پر
برملا منکر ہوں مےں ان عالموں کے علم کا
دھبہ جن کے جبہ پر ہے، داغ ہے دستار پر
ہم نے بھی اپنی جوانی مےں بہ عنوانِ غزل
چند بوسے لکھ دیئے اس کے لب و رخسار پر
چاند سورج تو ترے بس مےں نہیں لیکن ضمیر
اپنا مٹی کا دیا رکھ دو کسی دیوار پر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چمن کی بات چمن آشنا سے پوچھیں گے
کہاں گئی ہے وہ خوشبو، صبا سے پوچھیں گے
حقیقتاً ہی وہ کیا اتنا بے تعلق تھا
کبھی ملا تو یہ اس بے وفا سے پوچھیں گے
حساب اپنی بہت لغزشوں کا دیں گے مگر
دو اک سوال تو ہم بھی خدا سے پوچھیں گے
کچھ اپنے جسم کے بھی واجبات ہےں کہ نہیں
یہ مسئلہ بھی کسی پارسا سے پوچھیں گے
ضمیر و ذہن کی الجھن کے ہر دوراہے پر
کوئی بھی فیصلہ ہو.... کربلا سے پوچھیں گے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہزیمتوں کے باوجود اعتماد ذات ہے
فتح اور بات ہے شکست اور بات ہے
قلم مےں جو گداز ہے قدم مےں جو ثبات ہے
بہائے سرخوشی نہیں عطائے سانحات ہے
زمین اب بھی مخزن و مدارِ معجزات ہے
کہ یہ جہان آج بھی جہانِ ممکنات ہے
خدائے کائنات تیری ساری کائنات مےں
مرے لئے وہ ایک شخص ساری کائنات ہے
اسے سبھاﺅ چاﺅ سے سنواریئے نکھاریئے
کہ جسم ہی تو آدمی کا شعلہ ¿ حیات ہے
نگار خانہ ¿ جمال و رنگ میری شاعری
یہ زندگی کے شہر مےں ”دکانِ زیورات“ ہے
طویل عمر اور یہ کشادہ مشربی تری؟
ضمیر تیرے سر پہ بھی کسی ولی کا ہاتھ ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا کہا کہ پھول ہی سے پیار کرنے والے ہےں
ہم تو خار کو بھی شاخسار کرنے والے ہےں
قرض لے رہے ہےں کچھ گناہ روزِ حشر تک
اپنے کردگار سے ادھار کرنے والے ہےں
یہ تو لین دین کا ہے اک نجی معاملہ
غم بھی زندگی کو خوش گوار کرنے والے ہےں
عام آدمی کی جنگ لڑ رہے ہےں لفظ سے
شعر کو غریب کی پکار کرنے والے ہےں
ہم سے پوچھتے ہو تم ہمارا طرزِ زندگی
پیار! پیار! پیار! پیار! پیار کرنے والے ہےں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فقیر، اقلیم رکھتا ہے مگر بستر نہیں رکھتا
معلم فتح کر لیتا ہے اور لشکر نہیں رکھتا
انوکھی جاذبیت جو تری آنکھوں مےں بستی ہے
کرشمہ یہ جہاں کا کوئی جادوگر نہیں رکھتا
بہت ڈھونڈھا مگر وہ آدمی پایا نہیں اب تک
جو کوئی ڈر نہیں رکھتا، جو کوئی شر نہیں رکھتا
پرندوں کا بھی انسانوں پہ اک حقِ وراثت ہے
وہ کیسا آدمی جو گھر مےں ”چڑیا گھر“ نہیں رکھتا
حسیں تجھ سے بھی کافر تر بہت دیکھے، مگر کوئی
یہ چشمِ آشنا، یہ جسمِ خواب آور نہیں رکھتا
ضمیر اپنے وطن مےں دشتِ محرومی تو ہے لیکن
وطن مےں جو کشش ہے وہ زمانہ بھر نہیں رکھتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہےں بہت کام اس جہاں مےں ابھی
کچھ ستارے ہےں آسماں مےں ابھی
زیب دیتی نہیں وکالت عدل
لکنتیں ہےں مری زباں مےں ابھی
موج دریا مےں جیسے ٹھہری ہو
رات ہے شہرِ سرکشاں مےں ابھی
مےں نہیں ناامید بستی سے
آخری اینٹ ہے مکاں مےں ابھی
ابھی جاری ہے زندگی کی نمود
یہ کہانی ہے درمیاں مےں ابھی
شعر جو اس کے نام لکھنے تھے
کسمساتے ہےں میری جاں مےں ابھی
کتنے دانشوروں کی بیٹھک ہے
بادشاہوں کے سائباں مےں ابھی
ابھی خیموں کو مت کھلا رکھو
کچھ لٹیرے ہےں کارواں مےں ابھی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جینا کیا آسان ہوا ہے
گھر جب سے ویران ہوا ہے
پار سمندر رہنے والو
خیمہ کبھی مکان ہوا ہے؟
ہونٹوں کے سلِ جانے پر بھی
سارا حال بیان ہوا ہے
ایک کلی کے مرجھانے سے
اک گلشن ویران ہوا ہے
ایک چراغ بجھا دینے سے
سورج کا اپمان ہوا ہے
اک دیوار کے گر جانے سے
ہر گھر کا نقصان ہوا ہے
جنگ مےں اک گولی چلنے سے
زخمی ہر انسان ہوا ہے
اک اک حرفِ ناگفتہ سے
قتل کوئی امکان ہوا ہے
وہ بیلی دل جان ہمارا
ہم ہی سے انجان ہوا ہے
شعر ضمیر سجا کر لکھو
کلبہ کب سامان ہوا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دعا مےں بھی کبھی حرفِ دعا سے کچھ نہیں کہتے
خدا سب جانتا ہے ہم خدا سے کچھ نہیں کہتے
چمن اپنا ہے اپنے خون ہی سے سینچنا ہوگا
نمو کے واسطے سردو و صبا سے کچھ نہیں کہتے
بیان درد و غم سے اپنا غم کچھ کم نہیں ہوتا
کسی بھی آشنا، ناآشنا سے کچھ نہیں کہتے
ہمیں جو کام کرنا ہے اسی سے کام رکھنا ہے
چراغوں کو جلاتے ہے، ہوا سے کچھ نہیں کہتے
زمانے کو خود اپنی ذات پر اس طرح برتا ہے
گلہ اغیار کا کیا، اقربا سے کچھ نہیں کہتے
نہ یہ سمجھو کہ لغزش ہم خراباتی ہی کرتے ہےں
اگر ہم پارساﺅں کو حیا سے کچھ نہیں کہتے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس کو خبر کیا ڈھلتی عمر کا غم جو مرے اشعار مےں ہے
وہ لڑکی تو اپنی نئی جوانی کے تہوار مےں ہے
میری گواہی کا محتاج وجود امیرِ شہر کا ہے
میرے چاک گریباں کا بھی تار اس کی دستار مےں ہے
مالک اور بندے کی ”ملن دھڑکن“ کی چاپ بتائے کوئی
پوجا کی تھالی مےں ہے یا مسجد کے مینار مےں ہے
ابھی تو میرے لفظ و قلم کو ”جنگ محاذ“ پہ رہنا ہے
ابھی تو آخری مہلک وار زمانے کی تلوار مےں ہے
دھل نہیں پائی ہاری کے ”سرکنڈا گھر“ کی تاریکی
یہ سورج جو چمک رہا ہے خود بھی کسی غبار مےں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انسان اسی طرح سے محیط خطر مےں ہے
جیسے کوئی پرند ہوا کے بھنور مےں ہے
دیکھ آخری دریچہ گلی کا نہ بند کر
جینے کا ایک ہی تو بھروسا نگر مےں ہے
بے وجہ تو نہیں میری درماندگی کوئی
مےں رُک گیا ہوں اور زمانہ سفر مےں ہے
تیرے بغیر مجھ سے جو طے ہو نہیں سکا
باقی وہ فاصلہ ابھی میرے سفر مےں ہے
شہر سلام و امن کہاں ہے نہیں ملا
فوجوں کی چھاﺅنی تو ہر ایک رہ گزر مےں ہے
اے میری زندگی جو تجھے پھر نہ مل سکا
وہ نوجواں ضمیر ابھی ”مانسر“ مےں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لمحہ لمحہ رینگتی حیات ختم ہوتی ہے
ذرہ ذرہ اڑ کے کائنات ختم ہوتی ہے
یہ تو ایک جسم تھا جو تھک گیا، جو سو گیا
زندگی کب آدمی کے ساتھ ختم ہوتی ہے
کچھ عجب وہاں سے ہوگا جائزہ حیات کا
جہاں پہ جا کے حدِ ممکنات ختم ہوتی ہے
عشق کی علامتوں کا کیا شمار ہے، مگر
پہلی بات یہ ہے احتیاط ختم ہوتی ہے
پیار اک عجب لطیف ناگزیر جنگ ہے
جیت ختم ہوتی ہے نہ مات ختم ہوتی ہے
حیات کی وہ سطح کاش آدمی کو مل سکے
جہاں پہ آدمی کی اپنی ذات ختم ہوتی ہے
دیکھنا یہ ہے شبِ وصال یار مےں ضمیر
بات ختم ہوتی ہے کہ رات ختم ہوتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نکھرے تیرے رخسار کا رنگ اور زیادہ
بجتی رہے یہ کانچ کی ”ونگ“ اور زیادہ
لوگوں نے بنائے ہےں مکاں جتنے کشادہ
جینا ہوا انسان پہ تنگ اور زیادہ
آہنگِ دف و چنگ کو اونچا کرو لوگو!
دنیا نظر آتی ہے بجنگ اور زیادہ
روزن نہیں اس شہر کی دیوار مےں کوئی
مے اور زیادہ ہو، ملنگ اور زیادہ
گھٹتی گئی جتنی بھی مری عمر کی مہلت
بڑھتی گئی جینے کی امنگ اور زیادہ
مٹی کے گھروندوں مےں جو مرمر کا محل ہے
اس سنگ پہ ہو بارشِ سنگ اور زیادہ
سوچو کہ یہ رونق ہے مگر کس کے لہو سے
جس سے کھلا افرنگ کا رنگ اور زیادہ
زندہ نظر آتے ہےں ابھی چند ستارے
ترکش مےں بھرو تیر و خدنگ اور زیادہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیا خبر تھی ہم پہ ایک ایسا وقت آنا ہے
جس کو یاد رکھنا تھا اس کو بھول جانا ہے
اپنے وقت مےں بھی کچھ الگ الگ زمانہ ہے
ان نئے مکانوں مےں آدمی پرانا ہے
اس طلسم پر قائم ہے توازنِ ہستی
مسکرا کے رونا ہے، رو کے مسکرانا ہے
”لونگ“ تو گنوائیں گی لڑکیاں جواں ہو کر
پیرہن تو ”سوبھے“ گا جسم اگر سہانا ہے
کم نہیں ہے معبد سے اس درخت کا گنبد
آخری پرندے کا جس پہ آشیانہ ہے
ڈھل رہے ہےں ”ابرک“ کے پھول اب خرادوں سے
مالنوں کا ڈیرا بھی ایک کارخانہ ہے
کوئی شے نہیں ملتی دہر مےں بلا قیمت
امن جیتنا ہے تو جنگ ہار جانا ہے
توڑتے ہےں پتھر جو، پونچتے ہےں مٹی جو
”قصرِ صدر مملکت“ ان کا مختانہ ہے
اے نگارِ آزادی! تیرا جشن واجب تھا
کتنے بند رستوں پر کارواں روانہ ہے
جعفری ہے باشندہ ایسے اک جزیرے کا
جس مےں کوئی راجہ ہے، راﺅ ہے نہ رانا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ اپنی ذات اپنی روایات مےں رہے
جو لوگ زندگی کے مضافات مےں رہے
گو اہل دل عتاب مےں آفات مےں رہے
لیکن وہ اپنے عہد کی آیات مےں رہے
کوئی جگہ خراب نہیں، دیکھنا یہ ہے
کس مرتبے کے لوگ خرابات مےں رہے
وہ بھی تھے پاس اور بطِ مے بھی سامنے
دونوں جہان آج مرے ہاتھ مےں رہے
بیکار کب ریاضتِ شعر و سخن گئی
جو حرف مےں رہے وہ حکایات مےں رہے
کتنا جمیل تخلیہ بن باس مےں ملا
کتنے عظیم شہر مری ذات مےں رہے
کچھ ایسے ہم نے عمر گزاری کہ جس طرح
کچے مکان مےں کوئی برسات مےں رہے
مجھ کو تو اپنے دل کی بغاوت بہت رہی
تم بادشاہ تھے کہ فتوحات مےں رہے
زندہ رہا جو مجھ سا فراموش گار بھی
کچھ معجزات میرے بھی حالات مےں رہے
مجھ کو تو سانحات سے بھی روشنی ملی
یہ بھی چراغ تھے جو مری رات مےں رہے
کیا شاعری مری مگر اے کاش کوئی لفظ
اے مادرِ وطن تری سوغات مےں رہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ جہانِ جسم و جان و آب و ناں اچھا لگا
امتحان بھی تھا تو ایسا امتحان اچھا لگا
روح کی بالیدگی محرابِ مسجد مےں بھی خوب
بندگی کا رقص بھی پیش بتاں اچھا لگا
کچھ بھٹک جانا بھی طرز زندگی کی بات تھی
ہر یقیں کے ساتھ تھوڑا سا گماں اچھا لگا
خود فراموشی، خودی، بے گانگی، وابستگی
ہر پڑاﺅ فاصلوں کے درمیاں اچھا لگا
بجلیوں کے قمقمو! یہ کیا کیا تم نے کہ اب
اپنے مٹی کے چراغوں کا دھواں اچھا لگا
قیصر و کسریٰ کی رسوائی پسند آئی بہت
اس زمیں پر سر بہ زانو آسماں اچھا لگا
اس کے قدموں پر نچھاور اپنی ساری زندگی
جس کو مجھ سا شاعرِ بے خانماں اچھا لگا
جیسے اک کنگال ماں کو اپنا طفلِ زرد رو
مجھ کو بستی مےں مرا کچا مکاں اچھا لگا
سرگرانی تھی پہ چاہت کی تھی، نفرت کی نہ تھی
عمر ساری مےں وہ عہدِ رائیگاں اچھا لگا
منزلیں رستوں مےں بعض اوقات اچانک مل گئیں
ہائے وہ چہرہ جو مجھ کو ناگہاں اچھا لگا
بات کچھ تو تھی کہ امریکہ کے شہروں مےں ضمیر
وہ پرانا ”کوچہ چوڑی گراں“ اچھا لگا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
No comments:
Post a Comment